إِليها

 عايزة أتكلم معاكِ كلام كتير شوية 

ويارب أقدر أفيدك أو أوضح لك حقيقة أو أكون سبب في تراجعك عن قرار ممكن يقودك إلى الندم 

وخلينا نبدأ من كلامك : "وفيها إيه يعني لما أحب واحد وأروح أقوله، أصل الحب مش حرام !"

أنا مش هتكلم في أحكام وهوّا حلال ولا حرام

لكن هقولك إن ربنا أمرنا من البداية بأمور عديدة مش هتخلينا نوصل لمرحلة الحب أصلًا كـ غض البصر وعدم اتباع ما يمليه علينا هوانا والتقوى ومراقبة الله في السر والعلن 

يعني المفروض أصلًا إنك عمرك متوصلي لمرحلة الاهتمام برجل ما بالك الحب !

 

طيب وبفرض إنك مكنتيش بتعملي حاجة من الي فوق 

 وإنك حبيتي واحد ومش قادرة تكتمي أكتر من كده وقررتِ خلاص تريحي نفسك و تقوليله !

أحب أقولك يا عزيزتي إن كل الرجال الشرقيين يزهدون دائمًا بمن تعترف لهم بحبها - مهما وصلت درجة تدينه - ! 

هتقوليلي فينهم من الرسول صلى الله عليه وسلم وخديجه رضي الله عنها 

هقولك ده كان الرسول صلى الله عليه وسلم :)) مش راجل في زماننا ده !

يعني حتى لو كان بيفكر فيكِ قبلها وإنتِ سبقتيه بالخطوة دي ثقي إنه هيشيلك من دماغه خالص 

فالحل هنا علشان ترتاحي لو كنتِ لسه مقولتيلهوش تدعي ربنا لو خير ليكِ يرزقك بيه ولوشر يبعده عنك ويبعدك عنه وتنسيه 

وفي كلا الحالات متنسيش تدعي ربنا ميجعلش في قلبك غيره وتذكري:

 ( والذين آمنوا أشد حباً لله ) [البقرة: 165].

وفكري شوية بينك وبين نفسك : 

هل ربنا هيبقى راضي عن تصرفي ده ؟ 

أهلك أكيد ميعرفوش، طيب لو عرفوا ؟ تخيلي رد فعل والدك أو والدتك أو أخوكِ أو أختك ؟؟؟ هيبقوا مبسوطين

طيب وبعد ما تقوليله المفروض عايزة منه إيه بعد كده ؟ وبعدين يعني ؟ 

إيه مصير الحب ده ؟ فكرك يعني هيبقى آخرته جواز ؟ 

لو فاكرة كده فأحب أقولك إن الرجل الشرقي برضو مش بيجوز البنت الي بيحبها :D 

دي حقيقة صدقيني مش بحبطك خالص  

 

لو كنتِ بقى اتدبستي و قولتيله وبغض النظر عن ردة فعله و موقفه [  أصل لو كان رده إنه هوّا كمان بيحبك فإنتِ تبقي عبيطة لو صدقتي ! وتبقي عبيطة أكتر لو اتبعتي خطوات الشيطان اللي بعد الخطوة دي هتلاقي نفسكِ بتغرقي وبتغرقي باسم الحب الي وهمتِ نفسك بيه !،

ولو كان موقفه الرفض ومبقاش يكلمك ولا يديكي وش وكل الكلام ده فده أحسن ليكِ صدقيني حتى لو كان قلبك بيتقطع ]

أيًا كانت ردة فعله اقطعي أي حاجة ممكن توصلك بيه فورًا وكويس إنها جت على قد كده 

واقعدي مع نفسك قعده طويلة وراجعيها 

حاسبي نفسك

توبي لربنا واستغفري، والتوبة النصوح كما ذكر ابن عباس رضي الله عنهما : "الندم بالقلب ، والاستغفار باللسان ، والإضمار أن لا يعود إليه أبدا".

...

 " أطيلي صلاتك حتى لا تعودي تنتبهي إلى من سرق قلبك ،
إن كان أخذه.. أم ردّه !!

كلّما أقبلت على الله خاشعة صَغُرَ كلّ شيء حولك و في قلبك ..
فكلّ تكبيرة بين يدي الله تعيد ما عداه إلى حجمه الأصغر ..
تذكّرك أن لا جبار إلّا الله ،
و أنّ كلّ رجل متجبّر، حتى في حبّه، هو رجل قليل الإيمان متكبّر ..
فالمؤمن رحوم حنون بطبعه لأنّه يخاف الله

إبكي نفسك إلى الله و أنت بين يديه ،
و لا تبكي في حضرة رجل يمنّ عليك بالسعادة والشقاء متى شاء ..
البكاء بين يدي الله تقوى والشكوى لغيره مذلّة ..

هل فكّرت يوما أنّك غالية على الله ؟

اسعدي بكلّ موعد صلاة ..
إنّ الله بجلاله ينتظرك خمس مرات في اليوم
و ثمّة مخلوق بشري يدبّ على الأرض
يبخل عليك بصوته و بكلمة طيّبة

ما حاجتك إلى “صدقة ” هاتفيّة من رجل ..
إن كانت المآذن ترفع آذانها من أجلك ،
و تقول لك خمس مرّات في اليوم إنّ ربّ هذا الكون ينتظرك ويحبّك " نسيان.com/أحلام مستغانمي

ماحاجتك إليه والله معك 

ماحاجتك ؟

ربنا  يغنيكِ عن العالم كله، بس تقربي منه وتحبيه 

هتلاقي بابه مفتوح ليكِ في كل الأوقات 

هتلاقيه نعم السند والمعين 

هتستمدي قوتك منه 

بس إنتِ تقربي بس وتشوفي طريق النور وتسلكيه  

    

- نصيحة أخيرة - 

" لا تــلــوثــيــه

لا تلوثي قلبك بحب ليس من حقك

لا تلوثي سمعك بكلام ليس في مكانه و ليس في محله وليس من حقك

لا تلوثي نفسك بحب في الظلام

احفظي قلبك و نقيه لمن يستحقه لمن كتبه الله لكِ

حافظي علي قلبك و لا تقدميه إلي من يلوثه و يهينه

حافظي علي قلبك لزوجك "